13-15 oktyabr tarixlərində Bakıda Beynəlxalq Muzeylər Şurasının (ICOM) Azərbaycan Milli Komitəsi, Muzey İdarəçiliyi (INTERCOM) və Etnoqrafiya Muzeyləri və Kolleksiyaları (ICME) üzrə beynəlxalq komitələrinin birgə əməkdaşlığı ilə “Muzeylərdə kolleksiyaların toplanması siyasətinin dəyişdirilməsi: liderlik və sosial məsuliyyət zərurəti” adlı beynəlxalq konfrans öz işini uğurla başa çatdırıb.
Hibrid formatda (canlı və onlayn iştirak) keçirilən konfrans Azərbaycan Respublikası Mədəniyyət Nazirliyi və Azərbaycan Milli Xalça Muzeyinin dəstəyi ilə baş tutub. Konfransda əyani olaraq dünyanın bir sıra ölkərindən (Azərbaycan, Rusiya, Sloveniya, Xorvatiya, Almaniya, Rumıniya, Niderland) 10 mütəxəssis, o cümlədən beynəlxalq komitələrin sədrləri iştirak edib.
Üç gün davam edən konfransda “Muzeylərin dekolonizasiyası: mədəni dəyərlərin tarixi vətənlərinə qaytarılması və müstəmləkəçilik dövrünün neqativ nəticələrinin aradan qaldırılması”, “Muzeylər və etnoturizm” və “Müasir dövrdə muzey idarəçiliyi” mövzuları üzrə 20 məruzəçi çıxış edib.
Konfrans çərçivəsində qonaqlar üçün maraqlı mədəni proqram təşkil olunub. Azərbaycan Milli Xalça Muzeyi ilə yanaşı, onlar YARAT Müasir İncəsənət Məkanı, “İçərişəhər” Muzey Mərkəzi, Heydər Əliyev Mərkəzi, Azərbaycan Milli İncəsənət Muzeyi. Milli Azərbaycan Tarixi Muzeyi. Müasir İncəsənət Muzeyi və Qobustan Milli Tarix-Bədii Qoruğunu ziyarət ediblər.